香港文匯報訊（記者 子棠) Twins明年1月在紅館開唱慶祝成軍22年，由於反應熱烈，繼早前由6場加至8場、門票也火速售馨，今日宣布再加開2月1至4日的4場，並於下周五（15日）公開發售門票。
相隔9年再登紅館，一開就開12場；蔡卓妍（阿Sa）和鐘欣潼（阿嬌）破了Twins自己的紀錄，當然開心。阿嬌坦言，「聽到再加場，有愕然又有驚喜，仲覺得係一個突破。做咁多場 ，體能上都有少少擔心，但會盡全力去做；現已開始記歌詞和排舞；仲開始戒肉，剩係食菜和海鮮，因為只食齋又怕唔夠營養。」
阿Sa笑謂，「其實真係救到我燃眉之急，我好唔夠飛，之前我重用自己啲飛行里數去換自己演唱會飛，換完都係唔夠，依家再加即係有救，唔駛啲朋友唔開心，話我辦事不力。歌迷都不停留言，話搶唔到飛想喊，所以我哋今次特別為佢地搞緊一場加場係歌迷會專場，希望大家可以一齊入到來，同我哋一齊共渡22週年呢個咁值得紀念日子。但就唔好講咩紀錄，我剩係會諗，趁行得走得，做到咪做多幾場，再老啲唔知自己頂唔頂到。我就兩個月前已經開始食健康餐管理自己，依家瘦咗好多，但因為都要體力，所以不停有做運動練體能及增肌肉。本來唱8場，我同阿嬌話，不如一氣呵成唔停咁唱晒，免得好似蝕咗度氣咁，但12場，中間就要有休息日，休一休再做應該狀態會好啲。 」
此外，最近又有不法之徒，於社交網上開post ，指Twins演唱會招聘保安、檢票員等職位，演唱會總監馮貽柏表示，從來沒有進行過任何這些職位的招聘，勸喻歌迷千萬不要受騙，把自己的私人資料或電話等給予這些網站，小心保障個人利益。
責任編輯： 孫佳藝
