（香港文匯報記者 梁靜儀）著名演員郭晉安（安仔）身兼上市公司非執行董事，育有一子一女的他尊重子女理想，不強求子承父業，長子郭令山現於英國音樂學院深造，更見證兒子對於追夢有團火。而安仔本是三屆視帝，談到再逐最佳男主角獎，他認為現階段得獎只是成功感，作品流傳萬世更重要。
近日安仔在TVB台慶劇《金式森林》中飾演的上市公司主席方仰天，與陳曉華飾演的林澄上演一段忘年戀，成為觀眾熱話，當中他與三名爭產不肖子的對手戲更盡顯視帝功架，劇集播映以來的口碑收視同樣叫好。其實，現實中的安仔亦是上市公司非執行董事，與前妻歐倩怡育有一子一女。而對於財產分配，他暫時亦不用費心：「等佢哋再長大啲先，可能你畀佢，佢唔稀罕。年輕人未必係你諗嗰樣嘢，唔係你畀就要，暫時未有安排大仔將來畢業後喺公司幫手。」白手興家的安仔，未有要求兒子繼承父業，反而樂見兒子有自己的理想。大仔郭令山現於英國音樂學院就讀，擅長吹圓號，安仔表示兒子的夢想是做樂團指揮，自爆曾差點埋沒了兒子的理想： 「去到佢14歲嘅時候我想放棄嘅。因為我經常載佢去學樂噐，但佢永遠個進步都唔係好大，我又覺得有啲攰，我想同佢講不如放棄嘅時候，阿仔突然有一日喺車上唔出聲，然後等一陣，佢就同我講『爸爸，你知唔知咩叫有團火？?家好似有團火燒緊我，要我做一啲嘢，好想吹好呢個樂器。』我心諗由細到大我都係不停被團火去燒緊啦，嗰次之後我覺得個仔變咗另一個人，佢吹得好好，將來好大機會可以考入英國皇家音樂學院，已經有教授去同佢研究及教導佢，令佢更有信心做到指揮。」至於細女郭以雅就喜歡跳舞，兩兄妹各有理想，難怪安仔笑說：「一對仔女同戲裏啲仔女反差好大。」
演藝路上曾有反叛期
說到戲中四個子女何廣沛、陳浚霆、羅天宇及莊子璇（Hilary），安仔大讚他們都很勤力又有活力，給他很多新鮮感，並鞭策他要更努力，演出時再擦出多些火花。安仔因合作與Hilary傳出緋聞，對於Hilary處女演出被網民狠批生硬做作，安仔不敢評分，他說：「Hillary係需要時間及機會，（畀佢演出幾多分？）我唔會畀分數，不過會覺得佢係合格。」
雖然安仔不會要求後輩按照他的意見演戲，但有後輩就曾因他的一句說話，當作奮鬥的座右銘，這個人就是戲中飾演安仔家族軍師的羅子溢，子溢記得安仔曾說過做演員最重要是每年都有機會企在擂台上，企得上台就有機會得獎，並將這句話放在心中廿多年。安仔指這句話其實是引用「哥哥」張國榮說的「你一日冇離開呢個行業，你都唔可以畀人話你唔得。」他只是將這句話傳承落去。他大讚子溢今次的演出已成功將個人魅力展現出來，並看好對方離得獎相當近了，至於今年還有好多視帝級對手？他認為應該給有潛質的演員一個支持，「唔係好似我攞第一個就咁等18年， 呢啲鼓勵可以早啲畀。」
安仔自言在演藝路上曾有反叛期：「 以前好多前輩要我跟佢嘅方法去做，（意見接受，做法照舊？）咪做咗先，演員都有反叛期，當信心越來越強大嘅時候，人哋講嘅嘢你未必聽，如果聽咗咪copy人哋囉，咁我個性喺邊呢？」一向如人謙虛的安仔，自爆都有驕傲的時候，他笑說：「攞視帝之前已係咁，因為有年資加上有經歷就想認證自己，當然一定經歷過失敗，當去蕪存菁的時候，就想返去基本，好想有人給予意見，可是當去到一個階段亦無人會出聲。」
擇偶不用先過子女關
入行40年，安仔先後憑劇集《戇夫成龍》、《阿旺新傳》及《忠奸人》三度獲封「視帝」， 今年他有望第四度衝視帝，安仔坦言現在是追求成功多於成功感：「攞獎係成功感，而演員要嘅係成功，希望自己嘅作品可以一直傳頌落去，（覺得自己算唔算得上成功？）有人肯繼續睇你嘅戲就叫成功，自己近十幾年嘅大部分作品都稱得上成功。」
61歲的安仔事業得意卻愛情失意，去年5月與歐倩怡結束18年婚姻，問安仔對於人生下半場有什麼計劃？安仔自言並不感到寂寞，亦不怕寂寞，娛樂方面平日做到自己喜愛的運動，例如健身、打網球，擁有健康的身體，又多了時間陪伴一對子女，家庭溫暖已給自己很濃厚的愛，覺得自己現時的生活很豐盛，感情方面，他相信上天自有安排。 身為「鑽石王老五」的他，可會多了女性主動埋身？他說：「又冇，可能同我性格有關，我唔係好活躍嗰種，（可要先過仔女一關？）不用，佢哋好明。」對於緣分，安仔選擇隨緣。
0 已點過讚
